کرونا سے ہلاکتیں 4 لاکھ سے متجاوز، متاثرین 70لاکھ کے قریب پہنچ گئے، مختلف ممالک کی جانبب سے اعدادوشمارجاری نہ کرنے پر حقیقی متاثرین کی تعداد کا درست اندازہ نہیں لگا جاسکتا،رپورٹ

پیرس(این این آئی)کرونا وائرس کی عالمی وبا کے نتیجے میں اب تک چار لاکھ 581 افراد ہلاک ہوچکے ہیں۔ دسمبر 2019ء سے جاری اس وبا کے نتیجے میں متاثر ہونے والے افراد کی تعداد ستر لاکھ کے قریب پہنچ گئی ہے۔فرانسیسی خبر رساں ادارے کے کرونا کے حوالے سے جاری کردہ اعدادو شمار میں بتایا گیا کہ کرونا کی وبا سے دنیا کے 196 ممالک اور

خطوں میں اب تک متاثرہ مریضوں کی تعداد 69 لاکھ 49 ہزار 890 ہوگئی ہے۔ ان میں سے 30 لاکھ 30 ہزار 800 مریض صحت یاب ہوئے۔رپورٹ میں کہا گیا کہ کرونا وائرس کے حقیقی متاثرین کی تعداد کا درست اندازہ نہیں لگا جاسکتا کیونکہ بہت سے ممالک صرف موت کے خطرے سے دوچار ہونے والے مریضوں ہی کی تصدیق کرتے ہیں۔ہفتے اور اتوار کے ایام میں دنیا بھرمیں کرونا کے 3327 مریض ہلاک اور 119524 نئے مریض سامنے آئے۔گذشتہ چوبیس گھنٹوں کے دوران برازیل میں 904، امریکا میں 540 اور میکسیکو میں 341 کرونا مریض ہلاک ہوئے۔کرونا متاثرین کے حوالے سے سامنے آنے والے اعدادو شمار کے مطابق امریکا میں کرونا کے ایک لاکھ 10 ہزار 37 مریض ہلاک ہوئے اور 19 لاکھ28 ہزار 94 متاثر ہوئے۔ ان میں سے پانچ لاکھ 849 مریض صحت یاب ہوئے۔امریکا کے بعد کرونا سے ہلاکتوں میں برطانیہ دوسرے نمبر پرہے۔ برطانیہ میں 40 ہزار 542 مریض ہلاک اور 2 لاکھ 86 ہزار 194 بیمار ہوئے۔ برازیل میں 35930 افراد کرونا سے ہلاک اور 672846 متاثر ہوئے ہیں۔ اٹلی میں 33899 مریض ہلاک اور 234998 مریض متاثر ہوئے جب کہ فرانس میں 29155 ہلاک اور 190974 متاثر ہوئے۔